වනසතුන්ගෙන් වගාවන් ආරක්ෂා කිරීම සඳහා ඇද තිබූ අනවසර විදුලි රැහැනක පැටලීමෙන් ඊයේ පෙරවරුවේ 26 හැවිරිදි තරුණයෙකු සහ 17 හැවිරිදි තරුණියක මියගොස් තිබෙනවා.
කොලොන්න පොලිස් වසමේ පිටවෙලගම ප්‍රදේශයෙන් මෙම සිද්ධිය වාර්තා විය. ඔවුන් අනතුරට ලක්වී තිබුණේ තරුණිය පදිංචි නිවස ආසන්නයේදී.
සමාජ මාධ්‍යයෙන් හඳුනාගත් එම තරුණියව හමුවීමට දික්වැල්ල ප්‍රදේශයේ සිට තරුණයා පැමිණ ඇති බවයි වාර්තා වුයේ.
පසුව තරුණියගේ නිවස ආසන්නයේ දෙදෙනා කතාබහ කරමින් සිටියදී තරුණියගේ නිවැසියන් ඔවුන්ව දැක තිබේ.
එයින් බියට පත්වූ දෙදෙනා නිවස ආසන්නයේ මීටර් 500ක් පමණ දුරින් පිහිටි අක්කර 5ක පමණ කුරුදු වත්තක් දෙසට දිව ගොස් ඇති අතර එහිදී දෙදෙනාට විදුලි සැර වැදී තිබේ.
සිද්ධිය සම්බන්ධයෙන් ඇඹිලිපිටිය ස්ථානීය අපරාධ ඒකකය සහ කොලොන්න පොලීසිය එක්වී වැඩිදුර විමර්ශන සිදුකරයි.