ඔබේ දරුවාට මේ රෝග ලක්ෂණ ඇත්නම් වහාම වෛද්‍යවරයෙකු වෙත රැගෙන යන්න

August 31, 2021 at 1:33 PM

දරුවන්ට වැලඳෙන MIS – C නැමැති රෝගී තත්ත්වය මේ වන විට දිවයිනේ විවිධ ප්‍රදේශවලින් වාර්තා වෙමින් පවතින බවත් මේ හේතුවෙන් කොළඹ රිජ්වේ ළමා රෝහලේ දැඩි සත්කාර ඒකකයට තවදුරටත් දරුවන් භාර ගැනීමට නොහැකි බව එම රෝහලේ විශේෂඥ වෛද්‍ය නලින් කිතුල්වත්ත පවසනවා.

කොරෝනා වෛරසය ආසාදනය වූ දරුවන්ට සති 2-6ත් අතර කාලයෙන් පසුව මෙම රෝගී තත්ත්වය වාර්තා වන බවයි රිජ්වේ ආර්යා ළමා රෝහලේ දැඩි සත්කාර ඒකකය භාර විශේෂඥ වෛද්‍ය නලින් කිතුල්වත්ත වැඩිදුරටත් සඳහන් කළේ.

මෙම රෝගී තත්ත්වයන් නිසා ප්‍රතිකාර ලබන දරුවන් හේතුවෙන් මේ වනවිට රිජ්වේ ආර්යා ළමා රෝහලේ දැඩි සත්කාර ඒකකයට තවදුරටත් දරුවන් භාර ගැනීමේ හැකියාවක් මේ වනවිට නොමැති බවද ඔහු සඳහන් කළේ.

“කොරෝනා වැලඳිලා සති 2ත් 6ත් අතර කාලයකට පසුව විශේෂයෙන්ම ළමයින්ට වැලඳෙන Multisystem inflammatory syndrome in children එහෙම නැත්නම් MIS – C කියන මෙම රෝගී තත්ත්වය වැලඳුණු ළමුන් 45 දෙනෙකුට අධික සංඛ්‍යාවකට රිජ්වේ ආර්යා ළමා රෝහලේ අපි ප්‍රතිකාර ලබාදීලා තියෙනවා. මේ මොහොතේදී මෙම රෝගී තත්ත්වයෙන් පෙළෙන දරුවන් 4 දෙනෙක් රිජ්වේ ආර්යා ළමා රෝහලේ දැඩි සත්කාර ඒකකයේ ප්‍රතිකාර ලබනවා.

ලංකාව පුරාම තැනින් තැන මේ රෝගය මතුවෙනවා. ඒ වගේම දැන් දැන් අපි දකිනවා අලුත ඉපදුණු දරුවන්ට ඉපදුණු වහාමත් මෙම රෝගී තත්ත්වය මතුවෙනවා. කොරෝනා හැදුනට පස්සේ ඒ දරුවාගේ ඇඟේ තියෙන ප්‍රතිදේහ අපේම ඇඟේ වෙන වෙන අවයවවලට බලපානවා. හදවතට, වකුගඩුවලට, පෙනහළුවලට, අක්මාවට බලපානවා. විශේෂයෙන්ම හෘදයවස්තුවට බලපාලා රුධිර පීඩනය අඩුවෙලා මියයන්නට පවා ඉඩ තියෙනවා.

නිසි ප්‍රතිකාර ලබාදුන්නොත් සම්පූර්ණ සුවය ලබන්නත් පුළුවන්. අපේ රෝහලේ එක දරුවෙකු විතරයි මියගියේ. යම් දරුවෙකුට උණ, තදබල බඩේ කැක්කුම, වමනය, පාචනය, ඇස් රතු පැහැවීම, සමේ දද වගේ රෝග ලක්ෂණ තියෙනවා නම් වහාම වෛද්‍යවරයෙකු හමුවෙලා රෝගය පරීක්ෂා කරගන්න.

මවට කොරෝනා වැලඳුණහොත් ඒ මවගේ ඇඟ තුළ ඇතිවන ප්‍රතිදේහ දරුවාට යනවා. ඒ ආකාරයෙන් තමයි දරුවාගේ අවයවවලට බලපාන්නේ. ඒ රෝගීන්ගෙන් දැඩි සත්කාර ඒකකයත් පිරිලා තියෙන්නේ. ඒකෙ තේරුම.. කොරෝනාවලින් අසාධ්‍ය වෙලා ඉන්න තවත් දරුවෙක්ව අපට භාරගැනීමේ හැකියාවක් මේ වනවිට නෑ.” විශේෂඥ වෛද්‍ය නලින් කිතුල්වත්ත ප්‍රකාශ කර සිටිනවා.

(උපුටා ගැනීම : අද දෙරණ වෙබ් අඩවිය)