ගාල්ලෙන් කොවිඩ් ආසාදිතයින් 281ක් : වැඩිම ආසාදිතයින් පිරිස හබරාදුවෙන්

May 15, 2021 at 1:00 PM
මෙරටින් ඊයේ දිනයේ වාර්තා වූ කොරෝනා ආසාදිතයින්ගෙන් වැඩිම පිරිස ගාල්ල, හබරාදූව ප්‍රදේශයෙන් වාර්තා වූ බව කොවිඩ් 19 පැතිරීම වැළැක්වීමේ ජාතික ක්‍රියාන්විත මධ්‍යස්ථානය පවසනවා. එම ප්‍රදේශයෙන් වාර්තා වූ ආසාදිතයින් සංඛ්‍යාව 130 ක්. ඒ අනුව ගාල්ල දිස්ත්‍රික්කයෙන් වාර්තා වූ කොරෝනා ආසාදිතයින් සංඛ්‍යාව 281 ක් දක්වා ඉහළ ගොස් තිබෙනවා.

කෙසේවෙතත් ඊයේ දිනයේද වැඩිම ආසාදිතයින් වාර්තා වූයේ කොළඹ දිස්ත්‍රික්කයෙන්. එම සංඛ්‍යාව 555 ක්. ඉන් වැඩිම පිරිස වන 126 දෙනෙකු පිළියන්දල ප්‍රදේශයෙන් වාර්තා වූ බවයි කොවිඩ් 19 පැතිරීම වැළැක්වීමේ ජාතික ක්‍රියාන්විත මධ්‍යස්ථානය සදහන් කළේ. ඊට අමතරව මොරටුව ප්‍රදේශයෙන් ආසාදිතයින් 42 ක්, මහරගම ප්‍රදේශයෙන් ආසාදිතයින් 35 ක් සහ ගල්කිස්ස හා බොරලැස්ගමුව යන ප්‍රදේශවලින් ආසාදිතයින් 33 දෙනා බැගින් වාර්තා වී තිබෙනවා. හෝමාගම ප්‍රදේශයෙන් ආසාදිතයින් 28 ක් සහ හංවැල්ල ප්‍රදේශයෙන් ආසාදිතයින් 23 ක් ඊයේ දිනයේ වාර්තා වූ බවයි කොවිඩ් 19 පැතිරීම වැළැක්වීමේ ජාතික ක්‍රියාන්විත මධ්‍යස්ථානය සදහන් කළේ.

මේ අතර ගම්පහ දිස්ත්‍රික්කයෙන් ඊයේ දිනයේ කොරෝනා ආසාදිතයින් 236 ක් වාර්තා වී තිබෙනවා. ඊට ගම්පහ ප්‍රදේශයෙන් වාර්තා වූ ආසාදිතයින් 36 දෙනෙකු සහ වත්තල ප්‍රදේශයෙන් වාර්තා වූ ආසාදිතයින් 26 දෙනෙකු ද ඇතුළත්.
කුරුණෑගල දිස්ත්‍රික්කයෙන්ද ඊයේ දිනයේ ආසාදිතයින් 218 ක් වාර්තා වී තිබෙනවා.  ඊට කුලියාපිටිය ප්‍රදේශයෙන් වාර්තා වූ ආසාදිතයින් 69 දෙනෙකු සහ කුරුණෑගල ප්‍රදේශයෙන් වාර්තා වූ 43 දෙනෙකුද අයත්.

මේ අතර පානදුර දකුණ ප්‍රදේශයෙන් ඊයේ වාර්තා වූ ආසාදිතයින් 55 දෙනා සමගින් කළුතර දිස්ත්‍රික්කයෙන් වාර්තා වන ආසාදිතයින් ගණන 211 ක් දක්වා ඉහළ ගොස් තිබෙනවා.

පුත්තලම දිස්ත්‍රික්කයෙන් ඊයේ වාර්තා වූ ආසාදිතයින් ගණන 99 ක්. ඊට අමතරව මාතර සහ මාතලේ දිස්ත්‍රික්ක දෙකෙන්ද ආසාදිතයින් 79 දෙනා බැගින් වාර්තා වුණා. කෑගල්ල දිස්ත්‍රික්කයෙන් ආසාදිතයින් 73  ක්, නුවරඑළිය දිස්ත්‍රික්කයෙන් ආසාදිතයින් 71 ක්  ඊයේ වාර්තා වුණා. මුලතිව් දිස්ත්‍රික්කයෙන් ඊයේ දිනයේ වාර්තා වූයේ එක් ආසාදිතයෙකු පමණයි. කෙසේවෙතත් අනෙකුත් දිස්ත්‍රික්කවලින්  ආසාදිතයින් දස දෙනාට වැඩි පිරිස බැගින් වාර්තා වුණා.

මේ වනවිට මෙරටින් වාර්තා වන සමස්ත කොරෝනා ආසාදිතයින් ගණන එක් ලක්‍ෂ 38,085 ක් දක්වා ඉහළ ගොස් තිබෙනවා. කෙසේවෙතත් ඉන් එක් ලක්‍ෂ 10,108 දෙනෙකු මේ වනවිට සුවය ලබා ඇති බවයි සෞඛ්‍ය අමාත්‍යාංශය පැවසුවේ. තවදුරටත් රෝහල්ගතව ප්‍රතිකාර ලබන ආසාදිතයින් ගණන 27,054 ක්. ඊයේ දිනයේ වාර්තා වූ කොරෝනා මරණ 29 ත් සමග මෙරටින් වාර්තා වන සමස්ත කොරෝනා මරණ සංඛ්‍යාව 923 ක් දක්වා ඉහළ ගොස් තිබෙනවා.