අග්‍රාමාත්‍ය මහින්ද රාජපක්ෂ මහතාගේ දේශපාලනය තමන් පිළිනොගන්නා නමුත් එතුමා ශක්තිමත් නායකයෙක් බව හිටපු ජනාධිපතිනි චන්ද්‍රිකා බණ්ඩාරනායක කුමාරතුංග මහත්මිය පවසනවා.
ශ්‍රී ලංකා නිදහස් පක්ෂයට නව නායකත්වයක් අවශ්‍ය බවයි මෙහිදී හිටපු ජනාධිපතිනි චන්ද්‍රිකා බණ්ඩාරනායක කුමාරතුංග මහත්මිය අවධාරණය කර සිටියේ.
මාධ්‍යට අදහස් දක්වමින් ඇය මෙම අදහස් පළ කළා.
“ශ්‍රී ලංකා නිදහස් පක්ෂය කොහෙද කියලා මම හැමතැනම හොයනවා. පහුගිය අවුරුද්දේ සිරිසේන මේක විනාශ කළා. රාජපක්ෂ මහත්තයාගේ දේශපාලනය මම පිළිගන්නේ නෑ..නමුත් එතුමා ශක්තිමත් නායකයෙක්..”
“ශ්‍රී ලංකා නිදහස් පක්ෂය ගැන මට කණගාටුයි. අඬන්නද හිනාවෙන්නද කියලා තේරෙන්නේ නෑ.. සිරිසේන කැත විදිහට පක්ෂය විනාශ කළා. බැනුම් ඇහුවා , අපිව පරද්දන්න කියලා කිව්වා. දැන් ලැජ්ජා සහගත විදිහට අමාත්‍යාංශ කිහිපයක් දීලා තියෙනවා.”
“අපේ පක්ෂයේ සභාපතිට මොකුත් නෑ. ලේකම්ට බතික් අමාත්‍යාංශය..ඒකට ආයතන මොකුත් නෑ… අලුත් නායකත්වයක් යටතේ අපේ පාක්ෂිකයින් අතරින් තෝරාගෙන පක්ෂය ඉදිරියට ගෙනියනවා. එහෙම කරන ඕනකෙනෙකුට මගේ සහයෝගය ලැබෙනවා” යනුවෙන් ඇය වැඩිදුරටත් ප්‍රකාශ කළා.