පාර්ලිමේන්තු මන්ත්‍රී හරීන් ප්‍රනාන්දු ඊයේ පාර්ලිමේන්තුවේදී හැසිරුණු ආකාරය සම්බන්ධයෙන් පොලිස්පතිවරයාට පැමිණිල්ලක් කිරීමට නියමිත බව කථානායක මහින්ද යාපා අබේවර්ධන මහතා අද ප්‍රකාශ කර සිටියා.
හරින් ප්‍රනාන්දු මන්ත්‍රීවරයා පාර්ලිමේන්තුවට පන්දම් එළියක් ගෙන ඒමේ සිද්ධිය සම්බන්ධයෙන් පරීක්ෂණයක් පවත්වන බවයි කථානායකවරයා පාර්ලිමේන්තුව අමතමින් සඳහන් කර සිටියේ.
පොලිසියේ විරෝධය නොතකා මන්ත්‍රීවරයා විදුලි පන්දම් එළිය ද වෙනත් පාර්සලයක් සමඟ රැගෙන ආ බවට ද පැමිණිලි ලැබී ඇතැයි කථානායකවරයා සඳහන් කළේ.
හරින් ප්‍රනාන්දු මන්ත්‍රීවරයාගේ ක්‍රියා කලාපය තුළින් පොලිසියේ රාජකාරියට බාධා කළ බවට චෝදනා එල්ල වී ඇති බවත්, එය පාර්ලිමේන්තුවට තර්ජනයක් විය හැකි බවත් කථානායකවරයා පැවසුවේ.
ඒ අනුව මේ සම්බන්ධයෙන් පරීක්ෂණයක් පවත්වන ලෙස පොලිස්පතිවරයාට පැමිණිලි කර ඇති බවද ඔහු වැඩිදුරටත් පැවසුවේ.
හරින් ප්‍රනාන්දු මන්ත්‍රීවරයා විසින් ගෙන එන ලද “උපාංග” වෙනත් ද්‍රව්‍ය සමඟ මිශ්‍ර කළහොත් රසායනික ප්‍රතික්‍රියාවක් අවුලුවාලීමට යොදා ගත හැකි බව පවසමින් අමාත්‍ය දිනේෂ් ගුණවර්ධන විසින් ගෙන එන ලද “උපාංග” පිළිබඳව පරීක්ෂණයක් පවත්වන ලෙස ඉල්ලා සිටිනු ලැබුවා.
රීති ප්‍රශ්නයක් මතු කරමින් අමාත්‍යවරයා කියා සිටියේ පාර්ලිමේන්තු පරිශ්‍රය තුළ අවසර දී ඇති භාණ්ඩ ලැයිස්තුවේ නොමැති භාණ්ඩ රැගෙන ඒමෙන් සභාවේ ආරක්ෂාවට මෙන්ම මන්ත්‍රීවරුන්ගේ ආරක්ෂාවට ද තර්ජනයක් එල්ල වන බවයි.
ඊයේ දිනයේ පාර්ලිමේන්තු කටයුතු අතරතුර පාර්ලිමේන්තු මන්ත්‍රී හරීන් ප්‍රනාන්දු විසින් සභා ගර්භය තුළට විදුලි පන්දම් එළියක් රැගෙන ඒම හේතුවෙන් පාර්ලිමේන්තුවේ උණුසුම්කාරී තත්ත්වයක් හටගනු ලැබුවා.
විදුලිය විසන්ධි වුවහොත් වැසිකිළිය භාවිත කිරීමට හැකිවන පරිදි විදුලි පන්දම් එළිය රැගෙන ආ බව මන්ත්‍රීවරයා කථානායකවරයාට දැනුම් දී සිටියේ.
ඉන් අනතුරුව හරින් ප්‍රනාන්දු මන්ත්‍රීවරයා සහ දිනේෂ් ගුණවර්ධන මන්ත්‍රීවරයා අතර උණුසුම් බහින් බස්වීමක් ඇති වූ අතර එහිදී මන්ත්‍රීවරයා ප්‍රකාශ කළේ එවැනි උපකරණ පාර්ලිමේන්තුව තුළට තැබීම ආරක්ෂාවට තර්ජනයක් බවයි.