රජයේ පාසල්වල අනෙකුත් ශ්‍රේණි (6 සිට 9 ශ්‍රේණි) නොවැම්බර් 22 වන සඳුදා ආරම්භ කරන බව ජනමාධ්‍ය අමාත්‍ය ඩලස් අලහප්පෙරුම පවසනවා. අද (16) උදෑසන පැවති කැබිනට් තීරණ දැනුම්දීමේ මාධ්‍ය හමුවට එක්වෙමින් අමාත්‍යවරයා මේ බව සඳහන් කර සිටියේ.
මෙහිදී වැඩිදුරටත් අදහස් දක්වමින් අමාත්‍යවරයා පවසා සිටියේ, වසර දෙකකට ආසන්න කාලයක් පාසල් අධ්‍යාපනය මුළුමනින් ම අකර්මණ්‍ය වීම මෙරට සිදුව ඇති බරපතළ අපරාධයක් බවයි.
“ලබන සඳුදා සිට ඉතුරු සියලු පාසල්වල දුවලා පුතාලා පාසල් යන්න පටන් ගන්නවා. දැනටම අපිට වාර්තා වෙලා තියෙනවා සමහර තැන්වල පාසල් ඇතුළේ දරුවන් ආසාදනයට ලක්වු ප්‍රවෘත්ති ඔබ වාර්තා කරලා තියෙනවා. ඒ නිසා නැවත කිසියම් විදියකින් විපක්ෂ වෙන්න පුළුවන්, ආණ්ඩුව වෙන්න පුළුවන් පුද්ගලිකව වේදිකාවේ ඉන්න අපි වෙන්න පුළුවන් අපේ වගකීම් විරහිත හැසිරීමක් නිසා මේ වසංගත තත්ත්වය තවදුරටත් වැඩිදියුණු වෙලා රට ගිලන්වෙලා එහි ප්‍රතිඵලයක් ලෙස පාසල් නැවත වසා දමන්න සිදුවුවහොත් එය ජාතික අපරාධයක්. මම ආණ්ඩුව විදියට අපේ සහෝදර පක්ෂවලිනුත් විපක්ෂය විදියට සජිත් ප්‍රේමදාස මහතාගේ නායකත්වය යටතේ තියෙන විපක්ෂයේ දේශපාලන පක්ෂවලිනුත් අනෙක් සහෝදර පක්ෂවලිනුත් ඉල්ලීමක් කරන්නේ, මේ වෙලාවේ වෙන මොකක් නැතත් දරුවන්ගේ අධ්‍යාපනය ගැන හිතලා වගකීම් සහගතව අපි හැසිරෙමු, ජාතික අපරාධයක විත්තිකරුවන් වෙන්නේ නැතුව.”