සාම්ප්‍රදායික අයවැයකින් එහා ගිය නව දැක්මක් සහ වැඩපිළිවෙළක් සහිත අයවැයක් මෙවර රටට ඉදිරිපත් කෙරෙනු ඇතැයි තමා විශ්වාස කරන බව ජනාධිපති ලේකම් පී.බී. ජයසුන්දර පවසනවා.
හරිත ආර්ථිකයක්, පුනර්ජනනීය බලශක්තිය, තොරතුරු තාක්ෂණය සහ ඩිජිටල් ආණ්ඩුකරණය යන ක්ෂේත්‍ර කෙරෙහි එහිදී ප්‍රමුඛතාව හිමි වනු ඇති බවත් ‘සෞභාග්‍යයේ දැක්ම’ තුළ කටයුතු කරමින් රටේ ආදායම් ඉහළ නංවා ගැනීම කෙරෙහි විශේෂ අවධානය යොමු කර ඇති බවයි.
ජනාධිපති මාධ්‍ය කේන්ද්‍රයේදී ඊයේ පෙරවරුවේ පැවති මාධ්‍ය හමුවේදී ඔහු මේ බව ප්‍රකාශ කර සිටියා.
රටේ ආදායම් උත්පාදනයට භාණ්ඩ හා සේවාවල නිෂ්පාදන පරිමාව ඉහළ නැංවිය හැකි ආදායම් ප්‍රතිපත්ති මෙවර අයවැයට ඇතුළත් වනු ඇති බවයි ජනාධිපති ලේකම්වරයා පැවසුවේ.
රට සාමාන්‍යකරණය වීමත් සමග නව ආර්ථික වර්ධනයක් අපේක්ෂා කරන බවත් දිගින් දිගට ම අයවැය පරතරය ඉහළ අගයක් ගැනීම රටකට හිතකර තත්ත්වයක් නොවන බවයි මෙහිදී අදහස් දක්වමින් මුදල් අමාත්‍යංශයේ ලේකම් එස්.ආර්. ආටිගල සඳහන් කළේ.
මෙවර අයවැයේදී එම පරතරය අඩු කර ගැනීම කෙරෙහි අවධානය යොමු කර ඇතැයි මුදල් ලේකම්වරයා පෙන්වා දුන්නා.