කෝවිඞ් -19 ආසාදිත වී කුරුණෑගල පළාත් මහ රෝහලේ හදිසි ප‍්‍රතිකාර ඒකකයේ ප‍්‍රතිකාර ලබමින් සිටි කුරුණෑගල පළාත් මහ රෝහලේ බාහිර රෝගී අංශයේ සේවය කළ වෛද්‍ය සුදත් බණ්ඩාර (53) මහතා පෙරේදා ජීවිතක්ෂයට පත්ව තිබෙනවා.
කුරුණෑගල පළාත් මහ රෝහලේ සේවයේ යෙදී සිටියදී කෝවිඞ් -19 ආසාදිනය වී ජීවිතක්ෂයට පත්වූ පළමු වෛද්‍යවරයාද සුදත් බණ්ඩාර මහතාය. වසර 20කට අධික කාලයක් පුරා කුරුණෑගල පළාත් මහ රෝහලේ සේවය කළ වෛද්‍ය සුදත් බණ්ඩාර මහතා රෝග විනිශ්චයේදී අති දක්ෂ වෛද්‍යවරයෙකු බව කුරුණෑගල පළාත් මහ රෝහලේ වෛද්‍යවරු පැවසුහ. ලේඛන කලාව ප‍්‍රගුණ කරමින් ග‍්‍රන්ථ කීපයක් ද රචනා කර තිබෙන අතර හෙතෙම දක්ෂ ග‍්‍රන්ථ පරිවර්ථකයෙකි. එමෙන්ම දක්ෂ චිත‍්‍ර ශිල්පියෙකි. ඔහුගේ සිතුම් නිර්මාණ ප‍්‍රදර්ශණයක්ද පවත්වා ඇත.
කුරුණෑගල වැවරවුමේ පදිංචිව සිටි වෛද්‍ය සුදත් බණ්ඩාර මහතා කුරුණෑගල මලියදේව විද්‍යාලයේ ආදි සිසුවෙකි. දෙදරු පියෙකුවු ඔහුගේ බිරිඳ කුරුණෑගල පළාත් මහ රෝහලේ හදිසි ප‍්‍රතිකාර ඒකකයේ නිර්වින්දන වෛද්‍යවරියෙකි. දෙපළගේ එකම පිරිමි දරුවා වෛද්‍ය සිසුවෙකි. ” හිතහොඳ” වෛද්‍යවරයා නමින් ප‍්‍රචලිත වෛද්‍ය සුදත් බණ්ඩාර මහතාගේ අවසන් කටයුතු පසුගිය 19 දින නිරෝධායන නීතියට අනුව කුරුණෑගල නගර සභා ආදාහනාගාරයේදී සිදුවිය.