බදුල්ල මහ රෝහලේ පිළිකා වාට්ටුවේ ප්‍රතිකාර ලබමින් සිටියදී කොවිඩ් ආසාදනය වූ බවට හඳුනාගත් රෝගීන් අතුරින් තවත් අයෙකු ඊයේ රාත්‍රීයේ ජීවිතක්ෂකයට පත්ව තිබෙනවා. මෙසේ මරණයට පත්ව ඇත්තේ පස්සර, යූරි වත්තේ පදිංචිව සිටි 62 හැවිරිදි පුද්ගලයෙක් බවයි සෞඛ්‍ය අංශ පැවසුවේ.
කොවිඩ් -19 ආසාදිත මරණ දෙකක් බදුල්ල මහ රෝහලේ පිළිකා ප්‍රතිකාර ඒකකයෙන් මීට පෙර වාර්තා වී තිබුණා. පසුගිය 05 වනදා එක් මරණයක් සිදුව තිබූ අතර ඊයේ උදෑසන අනෙක් මරණය සිදුවූ බවයි රෝහල් ආරංචි මාර්ග පැවසුවේ.
බදුල්ල මහ රෝහලේ පිළිකා වාට්ටුවෙන් පසුගිය දිනවල කොවිඩ් -19 ආසාදිතයින් 34 දෙනෙකු හඳුනා ගත් අතර රෝගීන් හා ඔවුන් රැකබලා ගැනීමට රැඳී සිටි පිරිසක් මෙන්ම ගැබිනි වෛද්‍යවරියක් ඇතුළු කාර්යමණ්ඩල සාමාජිකයින් පිරිසක් ඒ අතර වුවා.
මේ අතර පෙරේදා දිනයේ සිදුකළ අහඹු ක්ෂණික ප්‍රතිදේහජනක පරීක්ෂාවකදී තවත් ආසාදිතයින් දෙදෙනෙකු බදුල්ල මහ රෝහලෙන් වාර්තා වී තිබුණා.
රජයේ වෛද්‍ය නිලධාරීන්ගේ සංගමයේ ඌව පළාත් සම්බන්ධීකාරක වෛද්‍ය පාලිත රාජපක්ෂ මහතා පැවසුවේ පිළිකා රෝගීන්ට කොවිඩ් වෛරසය ආසාදනයවීම බරපතළ තත්ත්වයක් බවයි. ඔවුන්ගේ ප්‍රතිශක්තිකරණය අඩුවීම හේතුවෙන් අවදානම වැඩි බව ඔහු පෙන්වා දෙනවා.