ඉන්දියාවේදී මියගිය බවට සැකකෙරෙන “මද්දුමගේ ලසන්ත චන්දන පෙරේරා” හෙවත් අංගොඩ ලොක්කාගේ මරණය තහවුරු කර ගැනීම සඳහා ඉන්දීය ආරක්ෂක අංශ ඉල්ලා සිටි පරිදි ඔහුගේ මවගෙන් සහ සහෝදරියගෙන් ලබාගත් DNA සාම්පල ඉන්දියාවට යැවීමට කටයුතු කෙරෙනවා.
පොලිස් මාධ්‍ය ප්‍රකාශක නියෝජ්‍ය පොලිස්පති අජිත් රෝහණ සඳහන් කළේ ඉන් අනතුරුව සංවිධානාත්මක අපරාධ කල්ලි නායකයෙකු වන අංගොඩ ලොක්කාගේ මියයෑම සම්බන්ධයෙන් කරුණු තහවුරු කරගත හැකි බවයි.
කළුතර එතනමඩල ප්‍රදේශයේදී සංවිධානාත්මක අපරාධ කල්ලි නායකයෙකු වූ සමයං නැමැත්තා ඝාතනය කිරීමේ සිද්ධියේ ප්‍රධාන සැකකරු ලෙස චෝදනා ලබා සිටින අංගොඩ ලොක්කා ඉන්දියාවේදී මියගිය බවට අවස්ථා කිහිපයකදී තොරතුරු වාර්තා වී තිබුණා.
කෙසේ වෙතත්, ඒ පිළිබඳව විද්‍යාත්මකව තහවුරු කළ සාක්ෂි මෙතෙක් හමුව නොමැති අතර, ඊට අදාළව කළුතර මහේස්ත්‍රාත් අධිකරණයට අපරාධ පරීක්ෂණ දෙපාර්තමේන්තුව කළ කරුණු දැක්වීමට අනුව සැකකරුගේ ළඟම ඥාතීන්ගෙන් DNA සාම්පල ලබා ගැනීමට නියෝග කරනු ලැබුවා.
ඒ අනුව ඉන්දීය ආරක්ෂක අංශ ඉල්ලා සිටි පරිදි අදාළ ඩී.එන්.ඒ. සාම්පල අංගොඩ ලොක්කාගේ මව සහ සහෝදරියගෙන් ලබාගෙන ඇත්තේ පසුගිය 09 වෙනිදායි.
එම DNA සාම්පල් නුදුරේදීම ඉන්දීය බලධාරීන් වෙත යොමු කරන බවයි පොලිස් මාධ්‍ය ප්‍රකාශකවරයා සඳහන් කළේ.