පොලිස් නිලධාරියකු සතු නිල ඇදුම වෙනත් අයකුට ඇද ජායාරූප ලබාගැනීමට ලබාදුන් බවට සැකපිට පොලිස් නිලධාරියකු බද්දේගම පොලිසිය විසින් අත්අඩංගුවට ගැනීමේ සිදුවීමක් “දිවයින” පුවත්පත වාර්තා කර සිටිනවා.
මෙසේ අත්අඩංගුවට පත්ව ඇත්තේ මහරගම පොලිසියේ රාජකාරි කරන පොලිස් කොස්තාපල්වරයෙක් බවයි එම වාර්තාවෙන් වැඩිදුරටත් සඳහන් වන්නේ.
දින කීපයකට පෙර ඇත්කඳුර ප‍්‍රදේශයේදී හෙරොයින් ළඟ තබාගත් පුද්ගලයකු අත්අඩංගුවට ගෙන ඔහුගේ ජංගම දුරකතනය පරීක්ෂා කිරීමේදී ඔහු පොලිස් නිල ඇඳුමෙන් සැරසී සිටින ජායාරූපයක් හමුවී ඇත. එම නිල ඇඳුම ඔහුට ලැබුණේ කෙසේදැයි විමසීමේදී අදාළ පොලිස් කොස්තාපල්වරයා ප‍්‍රිය සාදයකට සිය නිවසට පැමිණි අවස්ථාවකදී ඔහුගෙන් ඇඳුම ලබාගෙන ජායාරූප ගත් බව පවසා ඇත.
එම නිල ඇඳුමෙහි සඳහන් අංකය අනුව අදාළ පොලිස් නිලධාරියා හඳුනාගෙන ඔහුට පොලිසියට පැමිණෙන ලෙස දැනුම් දී ඇතත් ඔහු නොපැමිණ සිට ඇති අතර ඔහු හදිසියේම වෙනත් රාජකාරියක් සඳහා පොලිසියට පැමිණි අවස්ථාවේ ඔහු අත්අඩංගුවට ගෙන ඇත.
බද්දේගම පොලිසිය විසින් සිදුවීම සම්බන්ධයෙන් ඉදිරි විමර්ශන සිදුකරනු ලබයි.
( මුලාශ්‍ර : දිවයින පුවත්පත)