දිනක් තුල මෙරටින් වාර්තා වූ වැඩිම කොවිඩ් -19 ආසාදිතයින් සංඛ්‍යාව අද දිනයේදී මෙරටින් වාර්තා වූ බව කොවිඩ් -19 පැතිරීම වැළැක්වීමේ ජාතික ක්‍රියාන්විත මධ්‍යස්ථානය සඳහන් කර සිටිනවා.
අද දිනයේදී මෙරටින් කොවිඩ් -19 ආසාදිතයින් 976ක් වාර්තා වී ඇත. එම ආසාදිතයින් ගෙන් 971ක් දෙනෙකු පෑලියගොඩ පොකුරට සම්බන්ධ අයවළුන් වන අතර සිව්දෙනෙකු බන්ධනාගාර පොකුරෙන් වාර්තා වූ ආසාදිතයින් වනවා. කුවේට් සිට පැමිණි පුද්ගලයෙකුට ද වෛරසය ආසාදනය වී ඇති බවට තහවුරු වී ඇති බවයි කොවිඩ් -19 පැතිරිම වැළැක්වීමේ ජාතික ක්‍රියාන්විත මධ්‍යස්ථානය සඳහන් කළේ.
අද දිනය වන විට මෙරටින් වාර්තා වී ඇති සමස්ත කොවිඩ් -19 ආසාදිතයින් සංඛ්‍යාව 71,211ක් වන අතර සුවය ලබා ඇති සංඛ්‍යාව 65,053ක් වනවා.
ඒ අනුව දැනට රෝහල් ගතව සිටින කොවිඩ් ආසාදිතයින් සංඛ්‍යාව 5,788ක් බවයි කොවිඩ් -19 පැතිරීම වැළැක්වීමේ ජාතික ක්‍රියාන්විත මධ්‍යස්ථානය සඳහන් කළේ.
මේ අතර අද දිනයේදී කොවිඩ් ආසාදිත මරණ 05ක් වාර්තා වූ අතර ඒ සමග මෙරට තුල වාර්තා වූ සමස්ත කොවිඩ් මරණ සංඛ්‍යාව 370ක් දක්වා ඉහළ ගොස් තිබෙනවා.