පැරණි බෝගම්බර බන්ධනාගාරය තුළදී කලහකාරී ලෙස හැසිරුණු රැඳවියන් 11 දෙනෙකු දැඩි ආරක්ෂිත රැකවල් යටතේ රැඳවීමට පියවර ගෙන තිබේ.
බන්ධනාගාර කොමසාරිස් (පාලන) චන්දන ඒකනායක මහතා පැවසුවේ, අදාළ රැඳවියන් සිය දෙපාර්තමේන්තුවේ ත්‍රිපුද්ගල විනිශ්චය මඩුල්ලක් හමුවට ඉදිරිපත් කර, ඉදිරි ක්‍රියාමාර්ග ගැනීමට නියමිත බවයි.
මත්ද්‍රව්‍ය භාවිතය සහ ජාවාරම් කිරීමේ චෝදනා මත රක්ෂිත බන්ධනාගාරගත කර සිටි රැඳවියන් 11 දෙනෙකු පෙරේදා පැරණි බෝගම්බර බන්ධනාගාරයේ ස්ථාපිත නිරෝධායන මධ්‍යස්ථානයෙන් පලා යාමට උත්සහ දරා තිබේ.
ඒ සිය ඇලුමිනියම් පිගාන තියුණු ආයුධයක් සේ සකස් කර, බන්ධනාගාර නිලධාරියෙකු බිය වද්දමිනි.
එහිදී ක්‍රියාත්මක වූ බන්ධනාගාර නිලධාරියා රැඳවියන් සමග පොර බදා ඇති අතර, තත්ත්වය පාලනය සඳහා සෙසු නිලධාරීන් ද, ක්‍රියාත්මක වී තිබේ.
එම අවස්ථාවේ ආරක්ෂිත මුර කුටිවල සිටි නිලධාරීන් අහසට වෙඩි තැබිමක් ද සිදුකර ඇත.
රැඳවියන් සමඟ පොර බැදීමෙන් සුළු තුවාල ලැබූ බන්ධනාගාර නියාමකවරයා රෝහල්ගත කෙරුණු අතර, ඔහු සුවය ලබා මේ වනවිට රෝහලින් පිටව ගොස් තිබේ.