සියදිවි නසා ගනු ලැබූ සුපිරි බොලිවුඩ් නළු සුෂාන්ත් සිං රාජ්පුත් විසින් සිය රසිකයෙකුගේ නමින් සිදුකළ මුල්‍ය ආධාරයක් සම්බන්ධයෙන් තොරතුරු එරට මාධ්‍ය විසින් වාර්තා කර තිබෙනවා.
2018 වර්ෂයේදී ඉන්දියාවේ කේරළ ප්‍රාන්තයට බලපෑ ප්‍රබල ගංවතුර තත්ත්වය හේතුවෙන් එහි වෙසෙන ජනතාව දැඩි අසිරූ තත්ත්වයකට මුහුණ දී සිටි අවස්ථාවක් විය.
සමාජ මාධ්‍ය හරහා සුෂාන්ත් සමග සම්බන්ධකම් පැවැත්වූ එම රසිකයා ප්‍රකාශ කර සිටියේ තමන් සතුව මුදල් නොමැති බවත් කේරළයේ විපතට පත්ව සිටින ජනතාවට ආහාර ලබාදිමට අවශ්‍ය බැවින් ඒ හා සම්බන්ධ විය හැකි ක්‍රමයක් පවසන ලෙසයි.
මෙම ඉල්ලීම දුටු සුෂාන්ත් සිය රසිකයාට පිළිතුරු සපයමින් කියා සිටියේ විපතට පත්ව සිටින ජනතාවට සහන සැලසීම සඳහා ඉදිරිපත් වීම සම්බන්ධයෙන් තමන් අගය කරන බවත් තමන් විසින් ඔහුගේ නමින් රුපියල් කෝටියක මුදලක් පරිත්‍යාග කොට එය සිය ඉන්ස්ටර්ග්‍රෑම් ගිණුමේ පළකරන බවයි.
තමන් දුන් පොරොන්දුව එලෙසම ඉටුකල සුෂාන්ත් කේරළ ප්‍රාන්ත මහ ඇමතිවරයා විසින් පවත්වා ගෙන යනු ලබන ගංවතුර සහනාධාර ගිණුමට සිය රසිකයාගේ නමින් රුපියල් කෝටියක මුදලක් ලබා දෙනු ලැබුවාය.
තමන් විසින් එම මුදල ලබා දුන් බවට වන ජයාරූපය ඉන්ස්ටර්ග්‍රෑම් ගිණුමේ පලකළ සුෂාන්ත් එහි මෙසේ සටහනක් තබා තිබුණා.
” මාගේ මිතුරා ඔබට පොරොන්දු වූ පරිදි, ඔබට කිරීමට අවශ්‍ය දේ කර ඇත. ඔබ මට මේ දේ කරන්න උනන්දු කළා. ඔබ ගැන මම අතිශයින් ආඩම්බර වනවා. උපකාර අවශ්‍ය වූ අයටම එය භාර දුන්නා. ගොඩක් ආදරෙයි මගේ කේරළය.”
