රණවිරු සැමරුමට අදාලව සිදු කෙරෙන ආචාර පෙළපාලියක පුහුණුවීම් සඳහා සහභාගී වූ නාවික හමුදා සෙබළුන් දෙදෙනෙක්ටද කොරෝනා වෛරසය ආසාදනය වී ඇති බව ඊයේ (17) තහවුරු වී තිබෙනවා.
මේ සම්බන්ධයෙන් සිදුකළ විමසීමකදී නාවික හමුදා මාධ්‍ය ප්‍රකාශක ලුතිනන් කමාන්ඩර් ඉසුරු සුරියබණ්ඩාර සඳහන් කලේ මෙම නාවික හමුදා සාමාජිකයින් ගේ පළමු PCR පරීක්ෂණ වාර්තා වේ ප්‍රථිපල යලි සනාථ කර ගැනීම සඳහා දෙවන පරීක්ෂණයක් සිදු කිරිමට අවශ්‍ය ක්‍රියා මාර්ග ගෙන ඇති බවයි.
එම පෙළපාලිය පුහුණුවීම් සඳහා යොමු කර සිටිය නාවික හමුදා සාමාජිකයින් මාසයක කාලයක් පුරාවට හුදෙකලා කොට තබා PCR පරීක්ෂණ වලින් කොරෝනා වෛරසය නොමැති බවට තහවුරු වූ සාමාජිකයින් බවයි නාවික හමුදා මාධ්‍ය ප්‍රකාශකවරයා සඳහන් කලේ.
“මීට පෙර අවස්ථා කිහිපයකදී මෙලෙස පළමු PCR පරීක්ෂණ වලින් කොරෝනා ආසාදිත බවට තහවුරු වූ රෝගීන් දෙවන පරීක්ෂණයේදී ආසාදිතයින් නොවන බවට හෙළිව තිබුණා.
ඒ හේතුවෙන් අපි මෙම නාවික සෙබළුන් දෙදෙනාගේ යලිත් PCR පරීක්ෂණයක් සිදු කිරිමට අවශ්‍ය පියවර ගනු ලැබුවා.
මෙම සෙබළුන් දෙදෙනාට එලෙස කොරෝනා වෛරසය ආසාදනය වී ඇති බවට පළමු පරීක්ෂණයෙන් තහවුරු වීමත් සමග ඔවුන් ගේ සමීපතම ආශ්‍රිතයින් නිරෝධායනය ක්‍රියාවලියට යොමු කිරිමට අවශ්‍ය පියවර ද ගනු ලැබුවා.” නාවික හමුදා මාධ්‍ය ප්‍රකාශක ලුතිනන් කමාන්ඩර් ඉසුරු සුරියබණ්ඩාර ප්‍රකාශ කර සිටියේ.