පාස්කු ප්‍රහාරයට පෙර දින අපරාධ පරික්ෂණ දෙපාර්තමේන්තුවේ පොලිස් සැරයන් නන්දලාල් නැමත්තකු සමග හරීන් ප්‍රනාන්දු මන්ත්‍රීවරයාගේ පියා තත්ත්පර 356 ක දුරකථන සංවාදයක නිරත වී ඇතැයි දුරකථන දත්ත වාර්තා ඔස්සේ අනාවරණය වී තිබෙන බව පාස්කු ඉරුදින ත්‍රස්ත ප්‍රහාරය සම්බන්ධයෙන් විමර්ශනය කරනා ජනාධිපති කොමිසමේදී අනාවරණය වී තිබෙනවා.
වනාතවිල්ලුව පුපුරණ ද්‍රව්‍ය සොයාගැනීමට සහ සහරාන් හෂීම්ගේ කණ්ඩායමේ සමාජික ආමි මොහිදින් නැමැත්තා සොයා අපරාධ පරික්ෂණ දෙපාර්තමේන්තුවේ කණ්ඩායමක් පාසිකුඩා ගිය අවස්ථාවට මෙම නන්දලාල් නැමැති සැරයන්වරයා සම්බන්ධ වී ඇති අතර ප්‍රහාරයෙන් පසු ආමි මොහිදින් අත්අඩංගුවට ගත් අවස්ථාවේ ඔහුගේ දුරකතනයේ තිබි සොයාගෙන තිබුනේද මෙම නන්දලාල් නැමැත්තාගේ ඡයාරූපයක් බව මෙහිදී රජයේ ජ්‍යෙෂ්ඨ අධිනීතිඥවරයා ප්‍රකාශ කළේ.
මෙහිදී මන්ත්‍රීවරයා කොමිසම හමුවේ වැඩිදුරටත් පැවසුවේ, කිසිදු අවස්ථාවක තම පියා තමන් අමතා පෞද්ගලිකව පල්ලිවලට යන්න එපා යැයි නොකී අතර ඔහු තම සහෝදරිය අමතා කී දෙය පාස්කු ප්‍රහාරය සිදුවු දින පැවති මාධ්‍ය හමුවක දී තමන් පැවසු බවයි.
ඒ අනුව ” මගේ පියා දැන් ඉන්නේ රෝහලේ, ඊයේ රෑ මට කතාකරලා කිව්වා මේ පල්ලියට එහෙම යන්න එපා මෙහෙම ආරංචියක් තියෙනවා කියලා. බුද්ධි අංශවල මේ තොරතුරු තිබිලා තියෙනවා. තාත්තා කතාකරලා කිව්වේ කොච්චිකඩේ පල්ලි එහෙම යන්න එපා කියලා. ” යනුවෙන් තමන් මාධ්‍ය හමුවේ කළ ප්‍රකාශය මාධ්‍ය විසින් දේශපාලනිකව තමන්ට මඩ ගැසීමට අවභාවිතා කළ බවට මන්ත්‍රීවරයා චෝදනා කර සිටියේ.
එහිදී කොමිසමේ සිටි අභියාචනාධිකරණ විනිසුරුවරයා විමසා සිටියේ ” ඔබ මාධ්‍ය හමුවේ නොකී දෙයක් මාධ්‍ය ඔස්සේ ප්‍රචාරය කර තිබුනේද ?” යන්නයි.
තමන් කී දේ පමණක් මාධ්‍ය ප්‍රචාරය කර තිබු බවත් තමන් විනාඩි 45 ක පමණ මාධ්‍ය හමුවක් පැවැත්වුවද මාධ්‍ය ප්‍රචාරය කරන ලද්දේ සිය පියා ප්‍රහාරය ගැන දැනසිටියා යැයි තමන් පැවසු කොටස පමණක් බවත් මන්ත්‍රීවරයා පැවසුවේ.
එහිදී කොමිසමේ සමාජික විනිසුරුවරයා කියා සිටියේ, ඔබ විනාඩි 45 ක ප්‍රවෘත්ති සාකච්ඡාවක් පැවැත්වුවද මාධ්‍යයට උපුටාගෙන විකාශය කළ හැක්කේ එම ප්‍රවෘත්ති සාකච්ඡාවේ ඇති උණුසුම්ම විනාඩිය නොවේ ද යන්නයි.
මෙම සිදුවීම සම්බන්ධයෙන් අගරදගුරු හිමිපාණන් ” අපේ මිනිස්සු මැරුණා, ඇමති පුතා බේරුණා. ” යනුවෙන් පැවසීම තුළද තමන් විශාල වශයෙන් අපහසුතාවයට පත්වු බව මෙහිදී මන්ත්‍රීවරයා පැවසුවේ.
මෙම ප්‍රහාරය පිළිබද බොහෝ පාර්ශව පෙර දැනුවත්ව සිට ඇති බවට කරුණු අනාවරණය වී ඇති පසුබිමක පල්ලිය පමණක් කිසිවක් නොදැන සිටි බව තමන් විශ්වාස නොකරන බව හරින් ප්‍රනාන්දු මන්ත්‍රීවරයා කොමිසම හමුවේ වැඩිදුරටත් පැවසුවේ.
මේ අතර පාර්ලිමේන්තු මන්ත්‍රී හරීන් ප්‍රනාන්දු විසින් පාස්කු ප්‍රහාරය පිළිබඳ විමර්ශන කොමිසම හමුවේ කාදිනල් හිමියන් සම්බන්ධයෙන් කළ ප්‍රකාශයක් හේතුවෙන් එහි උණුසුම් තත්ත්වයක් හටගනු ලැබුවා.
ඒ කාදිනල් හිමියන් ප්‍රහාරය සම්බන්ධයෙන් පෙර දැනුවත්ව සිටියේ ද යන්න පිළිබඳ විශේෂ විමර්ශනයක් කළ යුතු බවට හරීන් ප්‍රනාන්දු මන්ත්‍රීවරයා සඳහන් කිරීමත් සමගයි. මෙහිදී කොමිසමේ සභාපති විනිසුරුවරයාට මන්ත්‍රීවරයා හට දැඩි ලෙස අවවාද කිරීමටද සිදුවිය.
මෙම ප්‍රහාරය පිළිබද බොහෝ පාර්ශව පෙර දැනුවත්ව සිට ඇති බවට කරුණු අනාවරණය වී ඇති පසුබිමක පල්ලිය පමණක් කිසිවක් නොදැන සිටි බව තමන් විශ්වාස නොකරන බව හරින් ප්‍රනාන්දු මන්ත්‍රීවරයා කොමිසම හමුවේ ප්‍රකාශ කර සිටියා.
මෙරට කතෝලික සභාවේ නායකයා සෑම වර්ෂයකම පාස්කු ඉරුදින උදෑසන දිව්‍ය පුජාවක් පවත්වන පසුබිමක, පසුගිය වසරේ පමණක් කාදිනල් හිමිපාණන් එම දිව්‍ය පුජාව නොපවත්වන ලද්දේ උන්වහන්සේ ප්‍රහාරය සම්බන්ධයෙන් පෙර දැනුවත්ව සිටි නිසාද යන්න පිළිබද විශේෂ විමර්ශනයක් කළ යුතු බව හරින් ප්‍රනාන්දු මන්ත්‍රීවරයා ජනාධිපති කොමිසමට දන්වා සිටියේ.
මන්ත්‍රීවරයාගේ එම ප්‍රකාශයත් සමග නැගි සිටි කාදිනල් හිමිපාණන් වෙනුවෙන් පෙනී සිටි ජනාධිපති නීතිඥවරයා ප්‍රශ්න කර සිටියේ ” අගරදගුරු හිමිපාණන් සෑම වර්ෂයකම පාස්කු දේව මෙහෙය පවත්වන්නේ පාස්කු ඉරුදිනට පෙර සෙනසුරාදා දින මධ්‍යම රාත්‍රීයේ බවත්, පසුගිය වසරේද සිරිත් පරිදි අප්‍රේල් 20 වන දින මධ්‍යම රාත්‍රීයේ කාදිනල් හිමිපාණන් කොටහේන සාන්ත ලුසියා ආසන දෙව්මැදුරේ එම දිව්‍ය පුජාව පැවැත්වු බවත් මම ඔබට යෝජනා කළහොත් එය පිළිගන්නේද ? යන්නයි.
එහිදි හරීන් ප්‍රනාන්දු මන්ත්‍රීවරයා කියා සිටියේ තමන් ඒ පිළිබද නොදැන සිටි අතර ඉහත කළ ප්‍රකාශය පදනම් විරහිත ව හුදෙක් මනසට ආ පමණින් සාක්ෂි නොමැතිව ප්‍රකාශ කළේ යැයි පිළිගන්නා බවයි.
ඉන් අනතුරුව ජනාධිපති නීතිඥවරයා හරින් ප්‍රනාන්දු මන්ත්‍රීවරයාගෙන් කොළඹ කතෝලික පෞද්ගලික පාසලක ඉගෙනුම ලබන මන්ත්‍රීවරයාගේ ඥාති පුත්‍රයකු පිළිබඳ විමසීමත් සමඟ මන්ත්‍රීවරයා නොසන්සුන් විය.
එහිදි නීතිඥවරයා ජනාධිපති කොමිසම හමුවේ කියා සිටියේ, අදාළ පාසලේ රගර් ක්‍රීඩා කණ්ඩායම ඉකුත් වසරේ පාස්කු ඉරුදින කොළඹ සුගතදාස ක්‍රීඩාංගනයේ පුහුණුවීම් වල නිරත වීමටත්, පුහුණුවීමෙන් පසු කොච්චිකඩේ සාන්ත අන්තෝනි දෙව්මැදුරට යාමටත් යොදාගෙන සිට ඇති බවය.
නමුත් අදාළ කණ්ඩායමේ සිටින හරීන් ප්‍රනාන්දු මන්ත්‍රීවරයාගේ ඥාති පුත්‍රයා පමණක් ත්‍රස්ත ප්‍රහාරය එල්ල වු දින පුහුණු සැසියට සහභාගි වී නොමැති බව ජනාධිපති නීතිඥවරයා කොමිසමේ අවධානයට යොමු කළේ.
කෙසේ වෙතත් එම ප්‍රශ්නය විමසීම සම්බන්ධයෙන් දැඩි ලෙස ආවේගශීලි වු මන්ත්‍රීවරයා කොමිසම් සභාවේ විත්ති කුඩුවේ සිටම කාදිනල් හිමිපාණන් නියෝජනය කළ ජනාධිපති නීතිඥ ශමිල් පෙරේරා එම ප්‍රශ්නය යොමු කිරීම සම්බන්ධයෙන් සිය විරෝධය පළ කරමින් දෝෂාරෝපනය කර සිටියා.
මන්ත්‍රීවරයාගේ ආවේගශීලි හැසිරීමත් සමග කොමිසමේ සභාපති විනිසුරුවරයා මන්ත්‍රීවරයාට දැඩි ලෙස අවවාද කර සිටියේ, කොමිෂන් සභාව තුළ සාක්ෂිකරුවෙකු වන ඔබ නීතිඥවරයෙකුට අගෞරව වන ලෙස හැසිරීම කොමිසමට අගෞරව කිරීමක් සේ සලකන බවයි.